Ubundi iminsi ntabwo ihwana,
Dore urazinduka mu gitondo,
Ushakashaka hirya hino,
Maze uwo munsi bikaguhira.
Bukeye bwaho siko bigenda,
Niyo uhashye maze ukaronka,
Bene ngango baragucunga,
Bakagucuza nta kigongwe.
Inyikirizo: Burya iminsi ntabwo ihwana,
Ibizaguhira ntibikugora,
None ureza ejo bikarumba,
Niyo wungutse ejo urahomba.
Iminsi yose ntabwo ihwana,
Iby’uyu munsi nibiguhira,
Ushime Imana yabiguhaye,
Ntiwirate ntiwirare.
Umunsi wose ucyana ayawo,
Iby’uyu munsi niba byanze,
Ihangane niko bigenda,
Kandi iby’ejo bibara ab’ejo.
Inyikirizo: Burya iminsi ntabwo ihwana,. .
Hari umunsi uramuka nabi,
Umunsi w’imvura y’urujojo,
Cyangwa imvura y’amahindu,
Nyamara kandi haguma ubuzima.
Habaho umunsi ukeye neza,
Umunsi mwiza w’agasusuruko,
Icyo ukoze cyose kikaguhira,
Ni koko iminsi ntabwo ihwana.
Inyikirizo: Burya iminsi ntabwo ihwana,. .