Yitwaga Kibwa, ubu yarakuze,
Yabaye umusore w’intarumikwa,
Yabaye umugabo, uyu w’ibikorwa,
Ntakiri muto, ntakiri Kibwa.
Dore yarasomye, ahinduka intiti,
Akunda umurimo, yanga ubunebwe,
Yanga umugayo, yanga urugomo,
Ni ukuri koko, umuto arakura.
Inyikirizo: Burya izibika zari amagi,
Uko tubarera niko bazakura,
Ubumenyi-ngiro barabukeneye,
Ni ukuri koko umuto arakura.
Yitwaga Dudu, none arakuze,
Ni umwangavu, avuyemo inkumi,
Yatamuye inzobe, abaye Zaninka,
Ni ukuri koko, umuto arakura.
Dore akora akazi, atizigamye,
Afite ubumenyi, akavuga indimi,
Arangwa n’ishyaka, intangarugero,
Ni indakemwa arangwa n’isuku.
Inyikirizo: Burya izibika zari amagi,
Yari Rubyogo, dore ni umugabo,
Ubu yubatse urwe, dore ateye imbere,
Yubatse izina akunda amahoro,
Agira umuco, akiyubaha.
Yari Kabibi, dore yubatse urwe,
Ubu ni umugore, Mutima w’urugo,
Arera beza, agira ubwuzu,
Afite ishema n’icyubahiro.
Inyikirizo: Burya izibika zari amagi,