Ugiye i mahanga, gushaka amahaho,
Ugiye i mahanga gushaka amaramuko,
Ugiye iyo gihera gushaka ayo mahera,
Kure nk’ukwezi aho isi iterwa inkingi.
Twumva iyo ngiyo ngo babaho neza,
Baratubwira ngo bayora akayabo,
Isambiye byinshi isohoza bikeya,
Bene ibyo ngibyo bihira bakeya!
Inyikirizo: Gumana natwe wijya i mahanga,
Iwacu ni heza nawe urabizi,
Amaboko yacu azajya adutunga,
Nuko Sakindi izabyara ikindi!
Iyo mu mahanga ibihanda ni byinshi,
Ubuzima bwaho buhenze birenze,
Wemezwa n’iki ko uzazana byinshi?
Burya i mahanga koko ni i mahanga.
Emere rwose dukunje amashati,
Dukore cyane dushake umugati,
Mu isi yose ntaho batarira,
Utazi i Bwami abeshywa byinshi!
Inyikirizo: Gumana natwe wijya i mahanga,
Oya, sigaho reka kudusiga,
Niduterwa tuzavunwa nande?
Nidutabaza tuzitabwa nande?
Inkoni ya kure ntiyica inzoka.
Uratwizeza ko uzagaruka,
Amazi arashyuha byo turabizi,
Ariko nanone ugiye aba agiye,
Igihanga umugenzi kiba iyo agiye!
Inyikirizo: Gumana natwe wijya i mahanga,