Teen skemer

Teen skemeraand,
as al jou einders eindelik brand
en jou hart jou smeek om rus
dan vermoed jy wie jy is.

Teen skemeraand,
is dwaas en wyse aanverwant:
elkeen weet die donker daal
iewers kom die nag hom haal.

Teen skemeraand,
dan wyk die woord, en as hy gaan
laat hy jou selfs in n kring
as een stomme enkeling.

Teen skemeraand,
weet jy elke trots is waan
kyk jy op en sien verby
iets wat is en ewig bly.

Teen skemeraand,
as al jou einders eindelik brand
en jou hart jou smeek om rus
dan eers weet jy wie jy is.