مرحبا يامرحبا ثم مرحبابه
ملتقى الوثبه ونشكر داعمينه

مهرجان الوثبه الدعم يحضابه
وسيف بو خالد عنوله طالبينه

شوط سيف الشعب يحسبله حسابه
القبايل ب الهجن مستهدفينه

الصعب بن مرخان حضرله و يابه
والاسد من عادته يحمي عرينه

بحايله منحاف روح في طلابه
السبوق الي فعلها شايفينه

يوم قفت كنها ظبي العدابه
ابعدت عنهن ووصلتها محينه

سدها بعد المسافه مادرابه
وغزر يوفن مايعبر اكسجينه

رقبتها سيف والمنحر نصابه
وخدها من كل ريس مزعفرينه

ناقة الي كل صعبن مايهابه
بو عبيد ويعلها تبطي سنينه

سلم التتويج ف الوثبة رقابه
وصار سيف الحول في قبضة يمينه

وكفو فاز برمز والبندق لفابه
وفالمنصه سلم رموزه الثنينه

استلم سيفه وفي مرغم ضوابه
ويالبه بين عربه ومشجعينه

سبق هجن الصعب لمشاهد حكابه
قدمن عرضًا يمتّع ناظرينه

احضرن وحضورهن كلن درابه
فعلهن في كل محفل عارفينه

سبقهن وشعارهن ماله مشابه
ع المباشر يفرح اللي متابعينه

هجن شهماً مثلّ بلاده و لابه
في منصات الخليج متوجينه

والغفيلي السيف سله من جرابه
وعالجهود اللي بذلها شاكرينه