तोच चंद्रमा नभांत
तीच चैत्र यामिनी
तोच चंद्रमा नभांत तीच चैत्र यामिनी
एकांती मज समीप तीच तूहि कामिनी
तीच तूहि कामिनी
तोच चंद्रमा नभांत

नीरवता ती तशीच धुंद तेच चांदणे
छायांनी रेखियले चित्र तेच देखणे
जाईचा कुंज तोच तीच गंधमोहिनी
एकांती मज समीप तीच तूहि कामिनी
तीच तूहि कामिनी
तोच चंद्रमा नभांत

सारे जरी ते तसेच धुंदी आज ती कुठे
मीहि तोच तीच तूहि प्रीति आज ती कुठे
ती न आर्तता उरात स्वप्न ते न लोचनी
एकांती मज समीप तीच तूहि कामिनी
तीच तूहि कामिनी
तोच चंद्रमा नभांत

त्या पहिल्या प्रीतीच्या आज लोपल्या खुणा
वाळल्या फुलांत व्यर्थ गंध शोधतो पुन्हा
गीत ये न ते जुळून भंगल्या सूरांतुनी
एकांती मज समीप तीच तूहि कामिनी
तीच तूहि कामिनी
तोच चंद्रमा नभांत