नाचत नाचत गावें
नाचत नाचत गावें ब्रह्मानंदीं तल्लिन व्हावें
ब्रह्मानंदीं तल्लिन व्हावें
नाचत नाचत गावें
नाचत नाचत गावें

आज कशाची किमया घडली कणकण गंधित झाला
एक अनामिक आनंदानें जीवच मोहुन गेला
या वेडाच्या लहरीसंगे
या वेडाच्या लहरीसंगे तन्‍मय होउन जावें
ब्रह्मानंदीं तल्लिन व्हावें
नाचत नाचत गावें
नाचत नाचत गावें

माझी मजला जाण नसावी अंतर माझे भोळें
अवघी काया वार्‍यावरतीं सूरच होउन डोले
अणुरूपानें परमात्‍म्‍याला
अणुरूपानें परमात्‍म्‍याला भेटुन मागे यावें
ब्रह्मानंदीं तल्लिन व्हावें
नाचत नाचत गावें
नाचत नाचत गावें

आयुष्याला उधळित जावें केवळ दुसर्‍यापायीं
आयुष्याला उधळित जावें केवळ दुसर्‍यापायीं
या त्यागाच्या संतोषाला जगिं या उपमा नाही
जन्म असावा देण्यासाठीं
जन्म असावा देण्यासाठीं एक मनाला ठावें
ब्रह्मानंदीं तल्लिन व्हावें
नाचत नाचत गावें
नाचत नाचत गावें
नाचत नाचत गावें