जा शोध जा किनारा
जा शोध जा किनारा
जीवननौका गोते खाई झुरतो जीव बिचारा
जा शोध जा किनारा

गहिवरल्या हृदयात जळावी अश्रृमधली गाणी
थरथरत्या ओठात विरावी हळवी आर्त विराणी
निराधार ही सुता धरेची कोठे आज निवारा
जा शोध जा किनारा
जीवननौका गोते खाई झुरतो जीव बिचारा
जा शोध जा किनारा

धरणीच्या उदरात फुटावी जलतृष्णेची लाही
झडली पानफुलांची माया छाया कुणी न देई
अनोळखी या दैवगतीचा भासे शून्य पसारा
जा शोध जा किनारा

वादळवारा काजळधारा गिळति डोंगरलाटा
पुसून गेल्या वाळु वरल्या ओल्या पाऊलवाटा
डोळ्यापुढती गिरक्या घेई दाही दिशांची कारा
जा शोध जा किनारा
जीवननौका गोते खाई झुरतो जीव बिचारा
जा शोध जा किनारा
जा शोध जा किनारा