देव देव्हार्‍यात नाही देव नाही देवालयी
देव देव्हार्‍यात नाही देव नाही देवालयी
देव चोरुन नेईल अशी कोणाची पुण्याई
देव देव्हार्‍यात नाही देव नाही देवालयी

देव अंतरात नांदे देव दाही दिशी कोंदे
देव आभाळी सागरी देव आहे चराचरी
देव शोधूनिया पाही देव सर्वाभूतां ठायी
देव देव्हार्‍यात नाही देव नाही देवालयी

देव मूर्तीत ना मावे तीर्थक्षेत्रात ना गावे
देव आपणात आहे शीर झुकवोनिया पाहे
तुझ्या माझ्या जड देही देव भरुनिया राही
देव देव्हार्‍यात नाही देव नाही देवालयी

देव स्वये जगन्नाथ देव अगाध अनंत
देव सगुण निर्गुण देव विश्वाचे कारण
काळ येई काळ जाई देव आहे तैसा राही
देव देव्हार्‍यात नाही देव नाही देवालयी
देव चोरुन नेईल अशी कोणाची पुण्याई
देव देव्हार्‍यात नाही देव नाही देवालयी