عزي لعينٍ ذالسنة مستهيضه
تزعج بدمعٍ مثل غيمٍ نثر ماه

والكبد رقّت عقب ماهي غليضه
من حب زولٍ لوّعوني بفرقاه

من عقب ما أنا أشاهده كل قيضه
طال الفراق وخاطري ما تناساه

علي ضاقت كل الأرض العريضه
والحزن زاد وكل حد تعداه

لو أن قلبي كل زولٍ يعيضه
انكفت من حبه ودورت لسواه

خنّة نسيمٍ هب من صوب فيضه
ريحه إلا عرّض غنوجٍ بممشاه

ياللي تداوون النفوس المريضه
جرح المحبة ما تعرْفون لدواه

اليوم قلبي كل شي يغيضه
متقاصفٍ أمْله بعد طول رجواه

مودةٍ ما أشوف منها حنيظه
إلا شقا قلبي وهمه وبلواه

صالحت لاجله كل نفسٍ بغيضه
ومشيت ممشا ما اغدي فيه لولاه

الحب لا سنّة ولا هو فريضه
لاشك صعبٍ من وقع فيه ينساه