شاب بسيط بيحلم إنه يبقى حاجة
من منطقة شعبية فيها ناس كثير محتاجة
زمان قبل ما نعرف التمييز والطبقية
زمان قبل تفريق الناس طبقات بعنصرية
مش حقارن ما بين زماننا والحال أيامه
دلوقتي قيمة الشخص بفلوسه مش باحترامه
سافر الولد برا البلد عشان يأمن مستقبله
واتقى ربنا في شغله ورزقه من أوله
عدت سنتين واتجوز أحلى بنت شافتها عينيه
من أول مرة شافها دعي ربنا تبقى ليه

وبدأوا بيت صغير طوبة، طوبة واحدة، واحدة
كانت هي سنده في برد الغربة والوحدة
وقوام ربنا رزقهم بأحلى بنت في البنات
والرزق زاد بعدها بثلات إخوات ولاد
والبيت كبر ودفي والغريب نسي غربته
بقى في وطنه حضنهم وفي لقاهم فرحته
غلطته إنه نسي إن الفرحة مش بدوم

المرض عرف طريقهم بقى بيزورهم كل يوم
الموت قرر يختار أكبر ولد من ولاده
ما بيتأخرش عمره بيجي في وقته وفي معاده
ويا ذوب قدروا يفوقوا من الصدمة اللي كانوا فيها
والموت خطف الصغير في الزيارة اللي بعديها
والحرب قامت في الخليج سنة تسعين
راجعين بكفايانا نعيش متغربين

الغربة حال ما بينتهيش
بنتولد وفيها نعيش
ما بين غريب جوة بلادي
وبلاد كثير ما تخصنيش

آه، آه، آه
بداية جديدة في مدينة محدش فيها ساكن
سموها نصر صحرا واسعة وشوية مساكن
حاول وعافر دور بس الفرصة مش متاحة
ما ليش مكان في بلدي قالها لنفسه وبصراحة
إتغرب ثاني وساب حبيبته للأولاد
في كل سبت كانت مكالمة طويلة في المعاد
يطمنهم عليه ويحكي إزاي بيوحشوه
ويرد عليه ولاده يقولوا نفسهم يشوفوه
الغربة مش اختيار لما يكون مفيش حلول
عمر الفراق ما بيقصر دايما بيزيد يطول
وبنفتكر الهدايا راح تعوض الحبايب
مين قال الهدايا تحل محل اللي غايب

مرة جواب في صورة مرة شريط في قصة
كل ده مش كفاية أصلك واحشهم لسه
والعمر بيجري طاير زي جري حبيبة إبنه
ورا تاكسي رايح ع المطار زي التاكسي اللي قبله
كان كل مرة يبكي لما أبوه يروح يسافر
وينام في حضنه لما يرجع أيوة أنا لسه فاكر
أنا فاكر كل كلمة كل تفصيلة وثانية
أصل دي حكاية أبويا مش أي حكاية ثانية
تشبه في الحكاوي ياما ناس كثير متغربين
اللي سافروا من شهور واللي هاجروا من سنين
والقصة مش بتخلص أصل الغربة في دمنا
جيل بيسلم جيل وأكيد حنسلم اللي بعدنا

الغربة حال ما بينتهيش
بنتولد وفيها نعيش
ما بين غريب جوة بلادي
وبلاد كثير ما تخصنيش

قبلنا ومننا ياما حلموا ناس كثير
حلم بأرض خضراء واسعة وخير في الكون ملوش مثيل
ولما صحيوا من منامهم لقيوا كل الأرض بور
فتحوا عينيهم في الضلمة ضلمة العقول
اللي في الصخور يكسر واللي منهم قال يقصر
اللي قصر قام مسافر واللي حاول بعده حصل
في النهاية دي رسالة كلها تقدير لوالدي
عاش حياته بيفني عمره عشان أقول عندي وعندي