صباح أو مساء الخير حسب توقيت سماعك
الأغنية عن كل شخص قابلته في المدينة وباعك
أو المدينة نفسها وكل ركن فيها وزاوية
لكل محطة مترو زحمة أو في أخر الخط خاوية
لكل طفل راح مدرسته إتعلم بقي شاطر
لكل شاب في جامعة لكل محاضراته حاضر
ولأحلامهم اللي طارت رغم السهر والتعب
لكل فرصة اتسرقت لكل حق اتنهب
لكل فرد وذكرى كانوا جزء من المدينة
اللي لسه بنحبها رغم إنها ضحكت علينا
من بعيد أكيد جمالها راح يسحر عينيك
مش لوحدك ياما غيرك ذاقوا سحرها قبليك
اللي شاف في دروبها حلم وقال في يوم يقدر يطول
واللي عاش العمر كله في وصفها يقول
نام في أحلامه الجميلة راح يفوق علي زيف وغش
اللي ساب الريف في بلده وفي المدينة هيبني عش

المدينة بألف وش
بتضحك بس في البراويز
ياما هدت من الرجال ياما ذلت مئة عزيز
مش بعيد أكون وحيد في وصفي وكلامي عنك
ياما غنوا لك أغاني وياما شهدوا لك لكنك
مش جميلة رغم ظنك أو جمالك مش حقيقي
مش عميقة رغم سنك لو قارنتي سني بيكي
أو يمكن أنا مش لاقيك في وسط الزحمة والمساكن
أو يمكن أنا مش هاويك مع إني فيك ساكن

بكفياكم غش فينا
إظهروا حقيقة المدينة
بكفياكم غش فينا
إظهروا حقيقة المدينة

مسجون في قلب أحلام الناس البسيطة الطيبين
اللي أيامهم تعيسة اللي أحزانهم سنين
والغريبة مصدقين إن بكرة مسيره جاي
إن شمسك يوم هتشرق راح تنور كل حي
بس أي حي فيهم راح تزور الشمس أرضه
اللي في كل متر عيلة ولا اللي بجنينه اللي بعده
إنزل لف في الشوارع صور الحقيقة بعينيك
بالحقيقة مش قصدي صورة لشيخ عجوز صعبان عليك

يطبعوا صورته في مجلة وينسبوا الفضل ليك
يكتبوا مقال طويل ويقولوا فيه ده قال وفضفض
والحقيقة إنه ساكت بس عينيه فضلت تعيط
قالوا دي دموع الفرح والرضا والإنبساط
والحقيقه ابتسامته بتسخر منكم وفي سكات
مش كفاية علينا كذب كفاية تأليف قصص
زي صور العيال اللي هربت من الحصص
مش عشان يلعب يزوغ لا هيروح الشغل بدري

اللي نجار واللي يجري يوصل للبيوت حاجات
واللي كفران بالساعات، اللي كفران بالساعات
وبيسألوا هوا ليه الطفل جوه الطفل مات
أو أمل اللي كانت بنت حلوة صغيرة
نفسها تكبر تكون إنسانة ومتقدرة
بس الناس شايفاها لحمة شايفه وسط وجوز عينين
اللي سليط اللسان واللي كلامه بالإيدين
وبيسألوا مين السبب، السبب في الكذابين

بكفياكم غش فينا
إظهروا حقيقة المدينة
بكفياكم غش فينا
إظهروا حقيقة المدينة

بكفياكم غش فينا إظهروا حقيقة المدينة
اللئيمة اللي علي أحلام ولادها ما كانت أمينه
قالوا من الحب اللي يقتل لما يطول قلبي وعقلي
وإنت قتلتيني بسهولة زي ما قتلتي اللي قبلي