الحفلة زحمة مليانة وشوش كثير أعرفها
خيلان وعمام وأسامي لسه صعب أنطقها
عشرة ومحبة واضحين ما بين الناس حواليّ
بيقولوا ده عيد ميلادي الحفلة دي معمولة ليّ
مبين كثير هداية كان جواب مبعوت لإسمي
مكتوب عليه بخط أمي لحبيبي إبني
طب ليه جواب ما إنت جنبي دائما طول الوقت
بلاش لماضة بقى إفتح جوابك لو سمحت
قالت لي في الجواب كل سنة وإنت زيي
ما إنت جوه قلبي في المكانة ملكش زي
تكبر وأشوفك زي ما إنت عايز تبقى عايز
كده أو كده حبيبي ولكلام جوابي حاسس

و كبرت أكثر وسنيني زادت عن صوابعي
عصبي و صوتي عالي أمي خافت يبقى طبعي
فقالت لي يا إبني خلي بالك دايما من كلامك
الكلمة سيف يا تقل منك يا تزيد مقامك
وفي يوم رجعت من المدرسة متبهدل من التراب
وسألت إزاي الغدر ممكن يجي من الصحاب
وحكت لها الخناقة وسمعتني بكل صبر
وقالت لي لما تهدى إبقى إقرأ من أول سطر
كانت كاتبة لي جواب عن الصحاب والجدعنة
وقالت لي اختار اللي يقول إحنا بدل ما يقول أنا
واعرف إن الصحاب لا بالكثرة ولا بالعدد
في الشدة هما إثنين ثلاثة عليهم تعتمد

في السما بشوفك لما الدنيا بيّ تضيق
وفي الليل بحكي لك عن كل قديم وجديد
في غيابك دايما جنبي
كلامك محفور في قلبي
رسالتك مش بس كلام
رسالتك إنسان أكونُ

وكبرت أكثر والدنيا كبرت أكثر بيّ
وبدأت أحس جوة مني إحساس جديد عليّ
فحكيت لها عن أحلى بنت في الجامعة كلها
وصفتها لأمي قلت ما شفتش زيها
مش عارف أقول لك إيه بس شكلي بحبها
قالت لي إحكي لي عنها أكثر قل لي إسمها
مش عارف وما تضحكيش عليّ إنت كمان
متسرع على طول مدلوق من صغري من زمان
فقالت لي أهم حاجة لما تحب لازم تقدر
تعرف قيمة حبيبتك ولأحلامها إياك تكسر
وما تستعجلش قل الكلمة لما تحسها
وإوعاك تخبي عنها حاجة دايما قل لها

عدت سنين كثير وشوفتي ولاد ولادك
رغم الفراق ما بينا عمر ما عيد ميلادي فاتك
بتجي لي في كل فرحة وبرضه لما تضيق عليّ
أنا مش مصدق إني عمري ما شوفتكيش بعينيّ
ربي اختارك تكوني جنبه وأنا لسة في اللفة
أكيد مكانك أحلى وأنا مبسوط لك إنت عارفة
فكتبتي ليّ لوحدي يجي ألف جواب وقصة
بتحاولي تعوضيني عن اللي فاتني واللي لسه
بس إنت بتوحشيني
وبتمنى تكوني قربي
طول عمري بحس بيك
فكان نفسي تحسي حبي
سمعاني أكيد يا أمي
وأكيد كمان شايفاني
لو مش شايفك بعيني
في قلبي شايفك من مكاني

في السما بشوفك لما الدنيا بيّ تضيق
وفي الليل بحكي لك عن كل قديم وجديد
في غيابك دايما جنبي
كلامك محفور في قلبي
رسالتك مش بس كلام
رسالتك إنسان أكونُ