ما بين لقانا والفراق كانوا ثانيتين
ما بين فراقنا واللقا سنين وسنين
كان نفسي أقول لك كل حاجة في الوقت المناسب
كان نفسي أقول لك ولكلامي ما كنتش حاسب
ياه لو كنت قلت كلامي أفتح قلبي وابوح
ياه لو كنت قلت قبل ما تروح

من زمان وقالوا الصبر مفتاح الفرج
صبرت جامد حتى الصبر منك إتحرج
عذاب الألم اللي اتلضم ويا خيط الزعل
خلى شيطاني حتى ندم ع اللي مني اتفعل
فأهم حاجة في التوبة النصوحة يكون الندم
مش هوصف لك شكل الشرخ اللي فيّ اترسم
شرخ كان بألم جوة قلب حلم
إتغير وشفت فيه إنسان كان أصله صنم
يرضيكي تمشي وتفارقي وفي ماضيه تكوني
بعد أما كنت كل حاجة من عقلي وجنوني

لاء مش اختيارك ما إنت لازم تسمعيني
القرار قرارك بس لازم تفهميني
أيوةمش هخبي حاولت أنسى واكابر
وفي كل مرة كبري كان عليّ فيها صابر
ياما حاش كلامه ياما، ياما سكت
وياما كان يلومني إن عيونها بكت
وكنت أصرخ وأقول له ده إنت كبريائي
ودايما رده واحد أصل هي دائي

كل داء وليه صنف علاج ودوا
بس فين تلاقي دوا للهوا
أنا اللي فيّ كوم وانت كوم وكفة
كل العالم يهون بس الدنيا بينا تصفى
وعد من الليلة دي خنجر جوة صدري
إنك لو سامحتي نهر روحي ثاني يجري
ويشيل حمل المراكب على طول الشراع
ويغني للحبايب بكفاية العمر اللي ضاع
أصلك إنت غيرهم إنت كل حاجة
وهما حاجة واحدة باختصار سذاجة
عارفك مش حتمشي ولا حتودعيني
جاي لك ثاني أطلب لو بس تسمعيني
لو بس تسمعيني

ياه لو كنت قلت كلامي
أفتح قلبي وابوح
ياه لو كنت قلت قبل ما تروح
ما بين لقانا والفراق كانوا ثانيتين
ما بين فراقنا واللقا سنين وسنين