منبه صوته عالي فوق عقلي وترتيباتي، يوم المقابلة فكرني بأول شغل في حياتي
مهندسين كثير جدعان وبيسعوا للوظيفة، خبرتهم في الحياة مفيش زي الورقة النظيفة
آخر سي في في إيدي بإسم نور عبد الكريم، ورقة مذكرات من نصه وقعت بتاريخ قديم
نور كان الكبير على بنتين اثنين، من المسؤولية عمره ما اشتكى طول السنين
صحابه دايماً بيلوموه وضغوط كثير عليه يا ابني هتعمل إيه بالعلم وبالدراسة حتبقى إيه؟
سؤال عارف إجابته فعمره في يوم ما حيره، أمه دايماً في ظهره بتسنده وتصبره
بس فجأة مرض أبوه بقى ياكل فيه ويكسره لازم يلحق إخواته وبيته قبل ما يخسره
نزل ورشة أبوه وقال للناس حنسى العلام شهور واتقال عليه أسطى زي أبوه تمام
في السر كان بيذاكر والدكاترة قدروه عرفوا ظروفه ومشاكله وفي الغياب إستحملوه
يوم ما استلم الشهادة كان طاير فوق السما مهندس ميكانيكا قد الدنيا إنما
خبر وفاة أبوه كان رصاصة هتقتله كثر الهموم من صغره قدرت يومها تصبره
الورقة قلبتها وفي عقلي بقول ده مش هيوقع وللوظيفة خلاص إخترته لأنه جدع

لا أنا هتحط على الهامش ولا هقبل أكون ع الرف
دي الدنيا بتمشي عشان إحنا في نفس الصف
أنا بسبق بتحدى ظروف إنت مبتعشهاش
ودور هو لا يمكن يوم هيكمل غير بدور هي

معاد المقابلة جه ومتحمس إني أشوفه أسمع منه أكثر عن حياته وأحلامه وظروفه
بس المفاجأة كانت أن نور مطلعش راجل في بنت قدامي بتقول لي أهلا مبقتش فاهم
سألت بإستغراب إسمك نور عبد الكريم؟ ردت عليّ بابتسامة أهلاً، وإنت مين؟
سألت ثاني ليكي أخوات؟ ردت أيوه بنات
وأنا المسؤولة عنهم من يوم ما أبويا مات، إتصدمت من الإجابة نفس كلام السطور
وجوه عقلي ألف صوت بيقول لي مش معقول إزاي كانت في ورشة؟ إزاي كانت سند؟
إزاي كانت رجولة دي بنت أصلاً مش ولد؟ إزاي عُمال رجال يقول ليها يا ريسة؟
إزاي حقول إخترت ست إخترت مهندسة؟
جوايا صوت بينكر السؤال قبل الإجابة، بينكر التردد وبيأمر بالإستجابة
لصوت العدل فيّ ويفكرني باختياري عشان قدامي بنت يبقى هغير قراري؟
عيب وعار عليّ وليها لازم أعتذر إزاي، ما بين أفكار مريضة قديمة بتأسِر؟
عقلت واديت لنور ورقة مذكراتها قلت لها إني عارف كثير قوي عن حياتها
مبروك عليك الشغل ومتأكد حتنجحي وأتمنى نكون صفحة في حياتك فيها تفرحي

لا أنا هتحط على الهامش ولا هقبل أكون ع الرف
دي الدنيا بتمشي عشان إحنا في نفس الصف
أنا بسبق بتحدى ظروف إنت مبتعشهاش
ودور هو لا يمكن يوم هيكمل غير بدور هي