مانقصني شي غير أني أشوفك
ودون شوفك .. ناقصه أشياء كثيره

تعرف ظروفي .. وأنا ما اعرف ظروفك
والزمن .. مدري متى يصحى ضميره

أنت لي ديرة .. رغم إحساس خوفك
ورغم كل اللي حصل .. لي أنت ديره

كيف ابروى .. كل ما أسمع حروفك
وكل ما اسمع علم منك .. اشتاق غيره

وكل ماحطيت .. بكفوفي كفوفك
أشعر أن الأرض ماهي مستديره

كيف اجازي طيب قلبك وامعروفك
وغير سيرتك أنت .. مالي أي سيره

والسؤال اللي أبي يسبق حلوفك
ومتأكد .. يرجع الغايب .. مصيره !!

هي متى عيني .. يجي يوم وتشوفك
ناقصتني .. أشياء من دونك كثيره