चला चला पावसाची पिरपिर आणि पिरपिरणारी शाळा
सुरु व्हायच्या आधी आपण पटकन
एका वेगळ्याच शाळेत जाऊन येऊया
अहो नंतर कदाचित वेळ नाही मिळणार
अभ्यासात चला चला ते यान पकडायला हवंना
हो अहो यानातच बसून तिकडे जावं लागत स्पेश्शट्टल
यू नो कारण हि शाळा कुठे आहे माहितेय का
निळ्या निळ्या मैदानात आणि शाळेतले क्लास टीचर
कोण आहेत माहितेय आपल्या ओळखीचेच आहेत ते चांदोबा गुरुजी

या वार्‍याच्या बसुनी विमानी सहल करुया गगनाची
चला मुलांनो आज पाहूया शाळा चांदोबा गुरुजींची
चला मुलांनो आज पाहूया शाळा चांदोबा गुरुजींची

आज पौर्णिमा जमले तारे आकाशाच्या वर्गात
चांदोबा गुरुजी तर दिसती कुठल्या मोठ्या मौजात
हसुनी चांदण्या करीती किलबील अपुल्या इवल्या डोळ्यांची
चला मुलांनो आज पाहूया शाळा चांदोबा गुरुजींची
चला मुलांनो आज पाहूया शाळा चांदोबा गुरुजींची

द्वितीयेपासून रोजच येती गुरुजी उशीरा शाळेत
मुले चांदणी फुलती आणिक सगळी अपुल्या गमतीत
कधी वर्गातून पळते उल्का ओढ लागुनी पृथ्वीची
चला मुलांनो आज पाहूया शाळा चांदोबा गुरुजींची
चला मुलांनो आज पाहूया शाळा चांदोबा गुरुजींची

कुणी तेजाचे ओठ हलवूनी मंगळास वेडावित असे
रागाने मग मंगळ वेडा गोरामोरा होत असे
बघुनी सारे हसता हसता उडते चंगळ तार्‍यांची
चला मुलांनो आज पाहूया शाळा चांदोबा गुरुजींची
चला मुलांनो आज पाहूया शाळा चांदोबा गुरुजींची

कधी वेळेवर केव्हा उशीरा अवसेला तर पूर्ण रजा
राग कधी ना या गुरुजींना कधी कुणा करीती ना सजा
असे मिळाया गुरुजी आम्हां करू प्रार्थना देवाची
चला मुलांनो आज पाहूया शाळा चांदोबा गुरुजींची
चला मुलांनो आज पाहूया शाळा चांदोबा गुरुजींची
या वार्‍याच्या बसुनी विमानी सहल करुया गगनाची
चला मुलांनो आज पाहूया शाळा चांदोबा गुरुजींची
चला मुलांनो आज पाहूया शाळा चांदोबा गुरुजींची