Sutta ’u lettu d’a za Cicca
c’è ’na jatta sicca sicca
sicca comu ’a gelusia
nira bestia china ’i raggia
è pigghiata ’i frenesia
com’u ceddu intr’a gaggia
Sutta sutta propriu sutta
undi pari tuttu scuru
undi ’u scantu va catugghia
a li pedi d’u criaturu
va si mmuccia ’a jattaredda
ca non poti cchiù sentiri
lu cuttigghiu senza sosta
ca cummogghia lu capiri
Sutta ’u lettu d’a za Cicca
c’è ’na jatta sicca sicca
e cu va ’i parra pi primu
s’a ddicca
Jattaredda insivata
sciuscia ratta jetta l’occhiu
intra ’a purbiri jettata
ca ti jetta ’a muzzicata
ca ti sgargia si è tuccata
’a to’ lingua arripizzata
battiata
assitata
ciddiata
sbentulata
’nturciniuta
’mbriacata
Purberazza razza amara
ca si spazza c’a ramazza
sutta ’u lettu a montarozzi
ruvisciati r’a buccazza
va si sperdi la sintenza
di la jatta ’mbelenata
comu dissi sua eccellenza
Sutta ’u lettu d’a za Cicca
c’è ’na jatta sicca sicca
e cu va ’i parra pi primu
s’a ddicca
Ammuccia ammuccia
chi tuttu pari
non ti servi cchiù parrari
chistu e nenti su’ parenti
si simenza non si senti
curri curri la felina
nesci comu ’na spisidda
pi ricordu idda lassa
’nu gran signu r’a so’ stima
Sutta ’u lettu d’a za Cicca
c’è ’na merda sicca sicca
e cu va ’i parra pi primu
s’a ddicca