GALDETZEN

Gauari nahi nioke galdetu
zergatik ez dituen
ene penak egunaren
argia bezala aienatzen

Izarrei nahi nieke galdetu
zergatik ez duten
ene bihotza gauaren
iluna bezala alaitzen

Haizeari nahi nioke galdetu
zergatik maitearen laztanak
pago hosto igarrak
bezala ekartzen

Euriari nahi nioke galdetu
zergatik ez duen
ene egarria zelai lehorrarena
bezala asetzen

Etsaiari nahi nioke galdetu
zergatik ez duen
herriaren garraisia
indarkeri ankerraren ordez
aditu nahi