Kveðja til bróður

Til bróður míns, Mikael

Lag: Gullý Hanna Ragnarsdóttir
Ljóð: Bergþóra Árnadóttir og
Gully Hanna Ragnarsdóttir

Ég kveð þig nú með kæra von í hjarta
að komir þú í ljóssins salinn bjarta.
Og til þín streymi ylur alls hins góða
yndisleiki heimsins bestu ljóða.
Og til þín streymi ylur alls hins góða
yndisleiki heimsins bestu ljóða.

Að hjartans gæska huga þinn nú sefji
og himins fegurð ásýnd þína vefji.
Að föðurást og faðmur kærrar móður
nú frelsi og huggi elskulegan bróður.
Að föðurást og faðmur kærrar móður
nú frelsi og huggi elskulegan bróður

Í bænum okkar undir skjóli fjalla
Skín sólin nú á minninguna alla.
Svo kært er mér að koma á æsku slóðir
eg kveð þig nú, og þakka kæri bróðir.
Svo kært er mér að koma á æsku slóðir
ég kveð þig nú, og þakka kæri bróðir.