Dirai vos senes duptansa
D'aquest vers la comensansa
Li mot fan de ver semblansa
Escoutatz!
Qui ves proeza balansa
Semblanza fai de malvatz.

Jovens faill e fraing e brisa,
Et Amors es d'aital guisa
De totz cessals a ces prisa.

Amors vai com la belluja
Que coa.l fuec en la suja
Art lo fust e la festuja,
Escoutatz!
E non sap vas qual part fuja
Cel qui del fuec es gastatz.

Amors soli'esser drecha,
Mas er'es torta e brecha
Et a coillida tal decha.

Greu sera mais Amors vera
Pos del mel triet la cera
Anz sap si pelar la pera.

Ab diables pren barata
Qui fals'amor acoata,
No.il cal c'autra verga.l bata.

Qui per sen de femna reigna
Dreitz es que mals li.n aveigna
Si cum la letra.ns enseigna
Escoutatz!
Lai ou non pot mordre, lecha
Plus aspramens no fai chatz.

Malaventura.us en veigna
So tuich no vos en gardatz!