Tant ai lo cor deseubut,
Per qu'ieu soi a totz estraingna,
E sai que l'om a perdut
Molt plus tost que non gasaingna
E s'ieu faill ab motz verais,
D'Aurenga me moc l'esglais,
Per qu'ieu m'estauc esbaïda
E.n pert solatz en partida.

Amic ai de gran valor
Que sobre tots seignoreia
E non a cor trichador
Vas me, que s'amor m'autreia.
Ieu dic que dis que non fai
Dieus li don mal'escarida
Qu'ieu m'en teing fort per guerida.

Bels amics de bon talan
Son ab vos toz jornz en gatge,
Cortez'e de bel semblan,
Sol non demandes outratge
Tost en venrem a l'assai,
Qu'en vostra merce.m metrai:
Vos m'avetz la fe plevida,
Que no.m demandes faillida.