गर्जा जयजयकार क्रांतिचा गर्जा जयजयकार
गर्जा जयजयकार क्रांतिचा गर्जा जयजयकार
अन्‌ वज्रांचे छातीवरती अन्‌ वज्रांचे छातीवरती
घ्या झेलून प्रहार घ्या झेलून प्रहार
क्रांतिचा गर्जा जयजयकार
गर्जा जयजयकार क्रांतिचा गर्जा जयजयकार

क्रुद्ध भूक पोटात घालु द्या खुशाल थैमान
कुरतडु द्या आतडी करु द्या रक्ताचे पान
संहारक काली तुज देती बळीच आव्हान
बलशाली मरणाहुन आहे अमुचा अभिमान
मृत्युंजय आम्ही मृत्युंजय आम्ही
आम्हाला कसले कारागार
अहो हे कसले कारागार आ आ आ
गर्जा जयजयकार क्रांतिचा गर्जा जयजयकार
गर्जा जयजयकार क्रांतिचा गर्जा जयजयकार

कशास आई भिजविसि डोळे
कशास आई भिजविसि डोळे उजळ तुझे भाल
रात्रीच्या गर्भात उद्याचा असे उषःकाल
सरणावरती आज आमुची पेटतात प्रेते
उठतिल त्या ज्वालांतुन भावी क्रांतीचे नेते
लोहदंड तव पायांमधले खळाखळा तुटणार
आई खळाखळा तुटणार आ आ आ
गर्जा जयजयकार क्रांतिचा गर्जा जयजयकार
गर्जा जयजयकार क्रांतिचा गर्जा जयजयकार

श्वासांनो जा वायुसंगे ओलांडुन भिंत
अन्‌ आईला कळवा अमुच्या हृदयांतिल खंत
सांगा "वेडी तुझी मुले ही या अंधारात
बद्ध करांनी अखेरचा तुज करिती प्रणिपात
तुझ्या मुक्तिचे एकच होते वेड परि अनिवार
तयांना वेड परि अनिवार गर्जा जयजयकार
गर्जा जयजयकार गर्जा जयजयकार
गर्जा जयजयकार क्रांतिचा गर्जा जयजयकार
गर्जा जयजयकार क्रांतिचा गर्जा जयजयकार
अन्‌ वज्रांचे छातीवरती अन्‌ वज्रांचे छातीवरती
घ्या झेलून प्रहार घ्या झेलून प्रहार
क्रांतिचा गर्जा जयजयकार
गर्जा जयजयकार क्रांतिचा गर्जा जयजयकार
गर्जा जयजयकार क्रांतिचा गर्जा जयजयकार