Let’s do it four by four
And then let’s do some more
يا، يا ياه أم الموجات يا

خايف أرفع إيدي عنكم وتطلعوا لغم
خايف أظلني ماسك فيكم وتطلعوا طعم
خايف أضيع من حياتي كمان كمشات
بين الدراسة والراب لا هان ولا هناك
خايف أصحى يوم ألاقي شخص عادي بالمرايا
خايف يوم أبطل أحلم وأترك ها الشغلة ورايا
خايف ينسوا يهجروا يتركوني ويكبروا
وأنا أكبر وأهدافي شوي، شوي يصغروا
خايف أوصل للي بدي أياه وأظل تعيس
خايف أطلع بالآخر واحد بعرفش يعيش
خايف يسحبوا الفيش وأصفي بلا وصله
كلهم يحبوا التقليد وأظلني لحالي الأصلي
خايف تفوز الظروف خايف تخون الحروف
خايف الحالة تلزمني إني ألزم السكوت
خايف من الصعود خايف من السقوط
خايف من مجهول وخايف من الجمود

جاييك بأم الموجات لا تشيل كل شي ونعيد من جديد
قارب معمول من أصوات يا بينقذني يا بغرق فيه
وهيلا، هيلا، هيلا وأملنا معلق بالريح

أكبر الحروب هي اللي بنخوضها بالصمت
الإكتئاب بوكل فينا شوي، شوي والضغط
قاعد على الصدر وبيدفشنا لنتطرف
فماد أيدي الكم مع بعض نقدر نتصرف
لنواجه كل الزفت ونطلع بأقل ضرر
رجعوا يوسف لأبوه بلكي يرجع فينا بصر
نترك أثر حتى لو صدى غصبٍ عنهم كلهم
وإذا أكل حديد صدأ بظل الموج يقلهم
غصبٍ عنكم الدم الجديد راح يورث الأرض
والموج راح يمسح معالم بطشكم
ويظل الغنا وحب الحياة فوق القبور الغرقانة
وأثر الموج راح يغسل كل الأرواح التعبانة
ونرجع على الشط نظاف ننسى كيف نكره ننسى كيف نخاف

جاييك بأم الموجات لتشيل كل شي ونعيد من جديد
قارب معمول من أصوات يا بينقذني يا بغرق فيه
وهيلا، هيلا، هيلا وأملنا معلق بالريح
جاييك بأم الموجات لتشيل كل شي ونعيد من جديد
قارب معمول من أصوات يا بينقذني يا بغرق فيه
وهيلا، هيلا، هيلا وأملنا معلق بالريح