Gaite de la tor,
Gardez entor
Les murs, se Deus vos voie!
C'or sont a sejor
Dame et seignor,
Et larron vont en proje!

Hu et hu et hu et uh!
Je l'ai vëu
La jus soz la coudroie.
Hu et hu et hu et hu!
A bien pres l'occiroie!

Compainz, en error
Sui, k'a cest tor,
Volentiers dormiroie!
N'aiez pas paor:
Voist a loisor
Qui aler vuet, par voie!

Hu et hu et hu et hu!
Or soit tëu
Compainz, a ceste voie
Hu et hu bien ai seü
Que nus en aurons joie!

Se salve l'honor
Au criator
Estoit, tot tens voudroie
Nuit feïst del jor:
Jamais dolor
Ne pesance n'avroie.

Hu et hu et hu et hu!
Bien ai veu
De biauté la monjoie.
Hu et hu c'est bien seu
Gaite, a Deu tote voie!