Estat ai en greu cossirier
Per un cavalier q'ai agut,
E voill sia totz temps saubut
Cum eu l'ai amat a sorbrier:
Ara vei q'ieu sui trahida
Car eu non li donei m'amor,
Don ai estat en gran error
En lieig quand sui vestida.

Ben volria mon cavallier
Tener un ser e mos bratz nut,
Q'el s'en tengra per ereubut
Sol q'a lui fezes cosseiller;
Car plus m'en sui abellida
No fetz Floris de Blanchaflor:
Eu l'autrei mon cor e m'amor
Mon sen, mos houills e ma vida.

Bels amics, avinens e bos,
Cora'us tenrai en mon poder?
E que jagues ab vos un ser
E qe'us des un bais amoros!
Sapchatz, gran talan n'auria
Qe'us tengues en luoc del marit,
Ab so que m'aguessetz plevit
De far tot so qu'eu volria.