أبويا، اللي عليه مسنود
حنان قلبه ملوهش حدود
كبرت ولسه من عطفه
كإنّي من ساعات مولود
أبويا، ده قصّة وحكاية
سنين تعبه بلا نهاية
وعن طيبته هقول لك إيه
ده جسر من الوفاء ممدود

أبويا وعزي من خيره
جناح حوّط على طيره
أنا اللي كفاية من غيره
ما كانش هيبقى ليّ وجود
أبويا في الوفاء نادر
وحتّى وهو مش قادر
أقول عايز يقول حاضر
ويفتح كلّ باب مسدود

وأقول له اِرتاح يرد يقول
وتيجي إزاي وأنا المسؤول
ويخرج كلّ يوم مهموم
ويرجِع من التّعب مهدود
وأقول له يا أبويا حملني
وهات من الشيلة شيلني
لإمتى يا أبويا هتشيلني
يقول لي طول ما أنا موجود

في كلّ دقيقة بحياها
ملامح أبويا جواها
أنا اللي بأبويا بتباهى
وبدعي له في كلّ سجود
وبدعي له في كلّ سجود
بدعي له في كلّ سجود