يا حسرة عليك يا دنيا فيك حكاية وحكايات
ساميني واقعدي حدايا واحكيهم لي بثبات
علاش هكذا حاقدة وسمية تظلي تبدلي في الصفات
تعذبي فيّ غير بشوية عييت من عذابك بركات

تلعبي بيّ ولّا معايا جاوبيني علاش هاذ السكات
قالوا لي عليك مسرحية أنا المسرح سكن لي في الذات
التذكرة خلصتها غالية اديت معايا شي وردات
دخلت للقاعة صفقوا عليّ طلع الستار والضو طفات
لقيت روحي في تمثيلية والديكور خوف ودمومات
طمعتيني ودرتي عليّ عندي جدي بصح مات

يا حسرة عليك يا دنيا فيك حكاية وحكايات
ساميني واقعدي حدايا واحكيهم لي بثبات
علاش هكذا حاقدة وسمية تظلي تبدلي في الصفات
تعذبي فيّ غير بشوية عييت من عذابك بركات

شحال من سلطان كان في دنيا جيوش لأمره طيعات
مال وعز قصور وسرايا العسة عليه بالأولوفات
غفل غفلة نقلبت الحية في ليلته ما صاب وين يبات
ذوقتي فلان عسل وفاكية وفلان شمختي له الفتات
فلان حرمتيه من الذرية وحياته من الفرحة خوات
فلان طلق زوجته المسكية زعف لما جابت له البنات

يا حسرة عليك يا دنيا فيك حكاية وحكايات
ساميني واقعدي حدايا واحكيهم لي بثبات
علاش هكذا حاقدة وسمية تظلي تبدلي في الصفات
تعذبي فيّ غير بشوية عييت من عذابك بركات

المسجون يرجو الحرية بالدقيقة يحسب الأوقات
الشهار يحلم بالشهرية يا حليلو مولى وليدات
كبدة المويمة مشوية واش سهرت و واش ربات
على وليدها بدل جنسية عجبه زين الروميات
خلى يماه وحدانية من البكاء والحرقة تعمات
باش يبين الرجولية بعث لها زوج محرمات

يا حسرة عليك يا دنيا فيك حكاية وحكايات
ساميني واقعدي حدايا واحكيهم لي بثبات
علاش هكذا حاقدة وسمية تظلي تبدلي في الصفات
تعذبي فيّ غير بشوية عييت من عذابك بركات
يا حسرة عليك يا دنيا
يا حسرة عليك، يا دنيا