كانت صبية بقلب أخضر
زهرة في وسط الشوك بتكبر
شايفة الحياة صافية وبريئة
وما تعرفشي إيه المقدّر
من صغرها كانت بتحلم
زي كل البنات بترسم
عروسة لابسة فستان وطرحة
بس اللي حلم غير اللي فسّر

قابلت ولد حبت كلامه
وشدها قوي باهتمامه
صدقت ما كانتش عارفة مخبي إيه
فيه ناس كثير الشر فيها
والمظاهر بتداريها
وزهرة مش شايفة الوش الحقيقي ليه

الطيبة دي ما تغرّكيش
مهما يقول ما تصدّقيش
ده ما فيش أسهل من الكلام
إنت أصلاً مش فارقة عنده
أناني وبيفكر في نفسه
يومين وهيقول لك سلام

وفي يوم ولا كان يخطر في بالها
قال لها كلام وجعها
وببساطة الندل باعها
سابها غرقانة في دموعها
لما من غير ذنب سابها
إبتدا يزيد إكتئابها
حسّت إنه خلاص ما فيش خير في البشر

صدمة صعبة جت في ثانية
حوّلتها لواحدة ثانية
أصل أول جرح سهل يسيب أثر
إوعي تبكي مهما شوفتي
في الحياة مكتوب يا بنتي
ننجرح علشان نشوف
عيشي أحلامك زي ما انت
قومي ثاني لو وقعتي
مهما كانت الظروف