Digls dudesch tschient, sen l'alp da Porta
ear' egn ospezi situo,
dasperas egna baselgieta
Son Peadar era tut numno.

Igl pelegrin ca qua passava
catava egn modest albiert,
a da burastgas targinava
antoc' igl pass gli fuss aviert.

An la baselgia da Son Peadar
fatschev' el sia devoziùn
ca banadieu se sieus vieadi
sen senda, veia a stradùn

Me poc davent, igl Ragn salieva
or digl sglatscher, segl sontg taratsch,
gli viandànt el talatgeva
digls grands misteris sut igl sglatsch.

Quest sglatsch imains, tge forzas regian
agl sieus intern a nus zupos?
Tge forzas stgiras, malvugliaintas,
igl sglatsch, igl sglatsch dal Morteratsch

Igl sglatsch s'avanza uss cun forza,
la measa alp â'l cuvarto
ad igl ospezi da Son Peadar
e tutafatg agl sglatsch sfundro.

A la sfundrànt igl zens cridava
ànc egn peer tuns, lur â'l tschieu.
La fossa eara uss sarada,
a pocs, me pocs, l'ân ple udieu.

Mo sch'igl pastur da l'alp da Porta
igl grànd sglatscher vul traversar,
od' el ànc oz, or d'egna fessa
igl vigl zenset planschànt sunar.