مش باقي مني غير شوية ضي في عينيّ
أنا هديهم لك وأمشي بصبري في الملكوت
يمكن في نورهم تلمحي خطوة
تفرق معاك بين الحياة والموت

مش باقي مني غير شوية قوة في إرادتي، حسبي عليهم وإنت بتخطي

مش باقي مني غير شوية ضي في عينيّ أنا مش عايزهم
لو كنت يوم هلمحك وإنت بتوطي
في معركة ما فيهاش ولا طيارات ولا جيش
وإنت في طابور العيش
بتبوسي إيد الزمان ينولك لقمة

بتبوسي إيد الزمن ينولك لقمة
من حقك المشروع مش باقي مني غير
شهقة في نفس مقطوع، وأنا صوتي مش مسموع
يا حلمنا الموجوع، من المرور ممنوع
وأنا صوتي مش مسموع
يا حلمنا الموجوع، من المرور ممنوع

مستني لما يمر موكب سلاطينك
مستني لما يمر موكب سلاطينك
ومش باقي مني غير شوية كفر بشروقك
على شوية رحمة من طينك، على شوية صبر من دينك

مش باقي مني غير شوية لحم في كتافي
بلاش يتبعثروا في البحر
ومش باقي مني غير شوية لحم في كتافي
بلاش يتحرقوا في قطر الصعيد في العيد
بلاش لكلب الصيد تناوليهم
خذي اللي باقي من الأمل فيهم
وابني لي من عظمهم في كل حارة مقام
وزوريني مرة وحيدة لو كل ألفين عام، ألم الجراح يتلم

ومش باقي مني غير شوية دم، متلوثين بالهم، مرين وفيهم سم
ومش باقي مني غير شوية دم
ما قدرش أسقيك مواجعهم، وبرضه ما قدرش أرميك وأبعهم
يمكن في مرة تطلبيني شهيد، هحتاج يوميها الدم
هحتاج يوميها الدم، يمضي على شهادتي