Vor langer, langer Zeit – ja, es war amoi
A Ochs und a Esel – in am oidn Stoi
Muh – Ia – Muh – Ia – Muh – Ia – Muh – Ia
Ia – Ia – Ia

Ja, so sans do gstandn – im Heu und im Stroh
Und sie warn zufrieden – ja, manchmoi sogar froh
Net immer, aber meistens – war de Futterkrippn voi
Und es war aa gmiatlich – do in eahnem Stoi

Auf oamoi frogt da Esel – Du, Ochs, sog moi, warum
Sogn olle zu mir oiwei – Mei, Esel, bist Du dumm
Mei‚ sogt do da Ochs – Denk da nix, geh weida
Mi hoitns, ehrlich gsogt – aa net für vui gscheida

Vor langer, langer Zeit – ja, es war amoi
A Ochs und a Esel – in am oidn Stoi
Muh – Ia – Muh – Ia – Muh – Ia – Muh – Ia

Es war mitten in da Nacht – ja, und auf amoi
Kemman do zwoa Leit nei – zu eahna do in Stoi
Da Ochs und aa da Esel – san a bisserl scho daschrocka
Wia si de Zwoa do einfach – ins Stroh zu eahna hocka

De Frau, des hot ma gseng – de war scho ganz schee schwanga
Und dann is auf amoi – aa no ganz schnoi ganga
A Kindl hots geborn – An Buam! – vor eahna do im Stroh
Mei, hot sie si gfreit – ja, und scho aa da Mo

Vor langer, langer Zeit – ja, es war amoi
A Ochs und a Esel – in am oidn Stoi
Muh – Ia – Muh – Ia – Muh – Ia – Muh – Ia

Und dann hots den Buam – in d‘Futterkrippn glegt
Do war für Ochs und Esel – da Futterplatz belegt
Trotzdem san de Zwoa – zum Warma zuawe gstandn
In dem Stoi, do war ja – koa Ofa net vorhanden

Und sie ham si zammgschmuckt – gega d‘Koitn, gegan Wind
Da Ochs und aa da Esel – und Vater, Mutter, Kind
Da Esel schaugt vorm Einschlafa – nomoi zum Kindl hi
Mei, do liegt scho wieda oana – der gscheida is wia i

Vor langer, langer Zeit – ja, es war amoi
A Ochs und a Esel – in am oidn Stoi
Muh – Ia – Muh – Ia – Muh – Ia – Muh – Ia

Jesus, Maria und Josef – so werdn sie genannt
De drei und grad da Jesus – san seitdem weltbekannt
Von der Geburt zu Bethlehem – gibts Buidln ja zu Hauf
Und auf jedem Buidl – san aa Ochs und Esel drauf

Sie ham si hoit zur rechten Zeit – ins Buidl eini gstellt
So san aa Ochs und Esel – berühmt wordn in da Welt
Do sagt da Ochs zum Esel – Schau, es kimmt, wias kimmt
Vui san vielleicht scho gscheida – aber mia Zwoa san berühmt