تهبي يا رياح الحياة دايماً بما لا أشتهيه
واللي السنين مقدماه غير اللي قلت نفسي فيه
يلاقي قلبي فين دواه واللي أذاه أقرب ما ليه، ده جرح بيعلّم

وصعب تسكن الآلام واخرج من اللي فات سليم
وصعب لمّا أروح أنام ما افضلش أراجع القديم
طلع مكلّف العلام وخذت درس في الصميم ولسه بتعلّم

ركز يا قلبي في اللي جاي وألف شكر للي باع
ما صانش حتى بوء شاي سلام يا ثلثمية وداع
واللي لقانا ما يساعوش فخانة الوداع تساع، مشاعرنا مش لعبة

ما تتشغلش باللي فات خليك يا قلبي في المفيد
كبر لأي ذكريات ركز وبس في الجديد
لازم تقسّم الخانات بمين قريب ومين بعيد، الحسبة مش صعبة

فرحت من الساعات ساعات وذقت من الحاجات حاجات
وعشت من السنين سنين ونابني من اللي فات فتات
ومن الحبيب جواب حزين وأسئلة بلا إجابات، حيرة ورا حيرة

حتى السعادة يوم ويوم حتى المحبة خذ وهات
وكله كوم وكومي كوم زمن بيرمي إفيهات
وزيّ عادتي أصوم، أصوم وأسد جوعي ذكريات وأفضها سيرة

آخرتها يا زمن عنيد كله سبق وأنا الوحيد
اللي مشيت ورا سراب واللي بدأت من جديد
الكل شاف اللي وراه حاسبت أنا ع المشاريب لوحدي كالعادة

مش باقي غيري في المكان مش باقي حاجة من اللي كان
مش باقي غير وجع زمان وهمس ذكرى في الودان
طاوعت حظى لما قال أصبر لكل شيء أذان، يا حظ ما تأذن

مش باقي غيري في المكان مش باقي حاجة من اللي كان
مش باقي غير وجع زمان وهمس ذكرى في الودان
طاوعت حظى لما قال أصبر لكل شيء أذان، يا حظ ما تأذن