أهـــل الفلك قالــوا بإنْ للأرض شكـلٍ دايري
أكـــيد مـــا به واحــــد بهالكــون يقـدر ينكره
إلاّ أنا رايــــي مَــعَ رايـــك يبيـــع ويشـــتري
لو قلت لي ما هي كره .. أقول انا ما هي كره

ياللي سكنت بناظري واغلى عَلَيْ من ناظري
انته هـــديه أحمِد الخالــــق علـــيها واشكره
حبك كبير اكبر من احسـاس الخيال بخاطري
أكبر من انّي انكــره .. واكــبر من انّي أذكره

خِــذني إلى المـريخ أو خـذني معك للمشتري
جهّــزت نفســي للسفــر ما باقــي الاّ التذكره
رجلــي على رجــلك وانا لك باوّلي وبآخـري
ما دام إيــدي في يدك بمشـي وعـيني مسكره

حبــي وحـــبك أيّ قــيس وأيّ ليلـى العامري
انتـــه وانا عشق القلوب اللي الزمان بيذكره
انا جمـــوح الحـــب يا مستقبلي يا حـاضـري
وانته في عيني يا حياتي ملح عمري وسكره