शिवचरित्र - एक सोनेरी पान

शिवचरित्र हे इतिहासातील
एक सोनेरी पान
आदर्शापुढे त्यांच्या सदैव
नकळत झुकते मान ll धृ Il
(आजही नकळत झुकते मान)

विखुरलेले वीर सेनानी
जोडिले एकेक करोनी
हसत केले त्या शूरांनीही
सर्वस्वाचे बलिदान ll १ ll
(आजही नकळत झुकते मान)

आप्तांचेही वैर झेलूनी
जुलूम अत्याचार मोडूनी
वधिलेच ते निर्दयी आणिक
मत्त क्रूर सैतान ll २ ll
(आजही नकळत झुकते मान)

नजरकैद ती दगा होऊनी
शिताफीने गेले निसटोनी
पर्वा न करिता प्राणाचीही
राखिला 'आत्मसन्मान' ll ३ ll
(आजही नकळत झुकते मान)

सकलांचा आधार बनोनी
स्त्रियांप्रती आदर ठेवूनी
लढिले न्यायासह सत्यासाठी
ते 'क्षात्रतेज' महान ll ४ ll
(आजही नकळत झुकते मान)

राजयोगी अष्टावधानी
तेजस्वी रूप ओजस्वी वाणी
सुराज्य ते स्थापिले तयांनी
एक 'दैदिप्यमान' ll ५ ll
(आजही नकळत झुकते मान)