اسمي مش هيتذكر ف اول الكلام
عقلي متدغدغ قلبي منى زعلان
حياتي رفضتني وكسرت معاهدة السلام
بقيت بنساه بسرعة لدرجة التوهان
من صغري شقيان مشوفتش طفوله حلوه
لو حكيت قصتي ممكن نغنيها غنوه
جسمى عجز ونا ف سن العشرين
حياتى ادمرت وسط ناس م سلكين
قلبي وعقلي ف صراع زى منافسين
صوتي رايح من كتر المنهده
حياتي كلها سودا و بالمعندة
بقيت محتاج فحياتى لكوزمو ووندا
حياتى مره بقيت ببلع ب لتر فانتا
قررت اشوف حياتي
وغير الشخص اللي جوايا محبوس
اهربه لشخص اجتماعي
بدل كان اللي منحوس
لقيت حياه وشغل وبدايه جديده روتين
بداية شغل جديده مع ناس مش معروفين
ف مقابله وبدله وبداية كام لغه بتتكلم
قبل اي حاجه انا اسمي يونس يا فندم
خلصت المقابله وكان عندي مبدأ
٧ الصبح هكون ف شغلي لسا ببدأ
استغربني وشوش الشركه وجه جديد علينا
عارفين اسمي يونس بس لازم تتعرف علينا
جواهم حاجه كأني فريسه ف وسطيهم
اكمنى شخص واحد اتلغبطت ف اساميهم
اجتهد ف شغلي ووصلت لقمتي
عصافير المهنه اشتغلو خطفو مني لقمتي
اسم يونس سمع ف وسط مجالهم
حظي وقعت فيهم ومكاني مش ف مكانهم
خطفوني وسط المشاكل وبقيت فيها مزنوق
كلامهم عني اني فاشل من نفسي بقيت مخنوق
رجعت لحالي ولمكاني بدمع من اللي جرالي
مالهم ومالي مسابونيش حته ف حالي
شيفتات زياده داسو عليا بجزامهم
خرجولي ضلوعي غصب م مكانهم
طردوني براها ومكنش ديما ليا حد
نايم ف اوضتي دايما والسبت زي الحد
قفلت..قفلت كل حاجه الناس ليا مش محتاجه
رجعت لحياتى الكئيبة بقيت ولا حاجه
علي اللي بينا بقا يكلموني
علي سكوتي بقو يحاسبوني
ف بقفل عيني وبروح لمنامي
عشان اخلص منهم بس بيقابلوني ف احلامي
حتي ف رسايلي بقو مش حلين
رسايلهم طويلة بس هما ساكتين
انا ايه اللي خلاني احزن انا ليه بقيت كئيب
ف قعدت صحابي حتي بقيت غريب
ساكت زى الصنم دايما مبتكلمش
بسمع كدبهم بس حافظ كل وش
لو كان فيه عصير بينسي كنت شربت
اشربه من الدنيا اللي منها كرهت
اشرب منه ومرجعش منه افوق
يادي النيله للدرجادي انا مخنوق
الباب مفتوح لو عايزين تدخلو اتفضلو
بس بلاش تتكلمو معايا بطلو تتكلمو بطلوو
ولو حبيتو تخرجو ف نفس الباب مفتوح
وسيبو الدوا بتاعي بعالج بيه الجروح
ولو قابلتو حبيبتي قولولها اني مستنيها
مش عايز حاجه من الدنيا غير اني الاقيها
كانت بتطبطب عليا عشان معيطش
نا لسا بحبها ومببطلش
انا نحس يمكن ده النصيب
مليش حد اشتكيله غير يونس القريب
مهدود من الدنيا ومن الناس مش عايز اأقرب
من الدنيا ومن الشغل ومن الناس يونس عايز يهرب