DEDUC Syon uberrimas velut torrentem lacrimas
nam qui pro tuis patribus
nati sunt tibi fili
quorum dedisti manibus
tui sceptrum imperi
fures et furum soci
turbato rerum ordine
abutuntur regimine
pastoralis officii
Ad corpus infirmitas
capitis descendit
singulosque gravitas
artus apprehendit
refrigescit karitas
nec lam se extendit ad amorem proximi
nam videmus obprimi
pupillum a potente
nec est qui salvum fatiat
vel qui iustum eripiat
ab inpio premente
Vide deus ultionum vide videns omnia
quod spelunca vispillonum
facta est ecclesia
quod in templum salemonis
venit rex babylonis
et excelsum sibi tronum
posuit in medio sed arrepto gladio
scelus hoc ulciscere
veni iudex gentium
kathedras vendentium
columbas evertere