Bele Doette as fenestres se siet.
Lit en un livre, mais au cuer ne l'en tient;
De son ami Doon li resovient,
Qu'en autres terres est alez tornoier.
E or en ai dol.


Uns escuiers as degrez de la sale
Est dessenduz, s'est destrossé, sa male.
Bele Doette les degrez en avale
Ne cuide pas oir novelle male.
E or en ai dol.


Bele Doette tantost li demanda:
"Ou est me sires, que ne vi tel pieça?"
Cil ot tel duel que de pitié plora.
Bele Doette maintenant se pasma.
E or en ai dol.


Bele Doette s'est en estant drecie,
Voit l'escuier, vers lui s'est adrecie;
En son cuer est dolante et correcie
Por son seignor dont ele ne voit mie.
E or en ai dol.


Bele Doette li prist a demander:
"Ou est mes sires, cui je doi tant amer?"
"En non Deu, dame, nel vos quier mais celer,
Morz est mes sires, ocis fu au joster."
E or en ai dol.


Bele Doette a pris son duel a faire:
"Tant mal i fustes, cuens Do, frans debonaire.
Por vostre amor vestirai je la haire,
Ne sor mon cors n'avra pelice vaire.
E or en ai dol.


Por vos devenrai nonne
A l'eglise Saint Paul.
Por vos ferai une abbaie tele
Qant iert li jors que la feste iert nomeie,
Se nus i vient ait s'amor fauseie,
Ja del mostier ne savera l'entreie.
E or en ai dol.


Por vos devenrai nonne
A l'eglise Saint Paul.


Bele Doette prist son abbaie a faire,
Qui mout est grande, et ades sera maire:
Toz cels et celes vodra dedanz atraire
Qui por amor sevent peine e mal traire.
E or en ai dol.


Por vos devenrai nonne
A l'eglise Saint Paul.