حامِـلْ، ودقّ القلـب كي قالتها ومن لحظتها
حسّيت روحي طايْرَة بفرحتْها
*
وسألت زعمـهْ وْلَدْ ولاّ بنيّـةْ وشِمْخُبِّيَّــة
في حُضْنها ليّام ليــه ولَــيَّ

عواطف غريبة يا ضيـا عينـيّ جْديـدة عليَّ
الروح صارت روح كي ذاقتهـا
*
ولقيـت روحي ع الجمْر نستنّى فْأَوّل سِنّــةْ
ونحلم ضنانا يعيش أحسن منّــا

ياربّ يلْقـى خِيْـرْ مَا يِتْمَنّـى وْيِبْنِـي جنّـةْ
عَ الأرضْ هُوَ احْلامْهَا وْيَقْظِتْهَا
*
وانا اللي قُلْتْ أيّامْنـا ما أصعبهم ومساربهــم
لا نجيب فيها صغار لا نعذّبهـم

اليوم صِرْتْ حْبِيبْهُمْ صَاحِبْـهُمْ نْقُولْ ما اطْيَبْهُم
الدنْيَا وردةْ والصغار ريحتهــا
*
يا مبشّرتني بحمْلها تعيشـي لي وتمحي ليلـِي
ويَزْهَا ضِيـَا قِنْديـلك وْقِنْديـلي

تْغنّي حياتي معاك كي تْغَنّي لي وتشفي غليلي
ولأيّام تضحكْ دايْمَةْ ضحكتهـا

…