As I cam in by Netherdale
At Turra market for to fee,
I fell in wi' a farmer chief
Frae the Barnyards o' Delgaty.
He promised me the ae best pair
I ever set my een upon
But when I gaed hame to Barnyards
There was naething there but skin and bone.
The auld black horse sat on his doup,
The auld white meer lay on her wime
And a' that I could hup and crack
They wudna rise at yokin' time.
Meg McPherson maks my brose
But her and me we canna 'gree
First a mote and syne a knot
And aye the ither jilp o' bree.
When I gae to the kirk on Sunday
Mony's the bonnie lass I see,
Prim sittin' by her daddy's side
And winkin' oure the pews at me.
I can drink and nae be drunk
O I can fecht and nae be slain,
O I can court anither's lass
And aye be welcomed tae my ain.
When Linten adie toorin adie
Linten adie torrin ae,
Linten lourin, lourin lourin,
Linten lourin lourin lee.