مطلوب زعيم
لشعب طول عمره عظيم
لشعب كان فاعل زمان لكنه هان
حتى إنه ثار
بإيدين كبار و إيدين صغار
مفعول بيه بيقسموه ويفرقوه
ويقطعوا في عين اللي جابه واللي جاب أبوه
عشان يموت أو ينتهي

مطلوب زعيم
لشعب حكامه خانوه
وتوهوه وغيبوه واللي إنتبه منه وفاق
غموا له عينه وكمموه
وسلموه في المعتقل
لكلاب جعانة يقطعوه
لكنه رغم القهر قام زأر وزام
وفي إسبوعين زلزل حصون الجلادين
هد النظام فوق راس جميع، المفسدين

مطلوب زعيم
يحمي الحقوق
يعدل ما بين الناس تمام زي الفاروق
ويكون حنين ع الفقير
وعلى اللي فاسد يفتري
يهدم على دماغه الشقوق
ويعلقه في المشنقة
أو يرفعه، على راس خازوق

مطلوب زعيم
ميقولش ع الخواف حكيم
ويكون كمان سمعه سليم
يسمع لنبضة قلبنا
ويكون مكانه في وسطنا
ميعيش أبدا في القصور
والبعض منا للأسف ساكنين قبور
يشرب وياكل أكلنا
ويعيش كواحد مننا
يسمع لنا ويشور وياخد رأينا
وقت الخطر نتلم حواليه كلنا
ونضحي وياه بعمرنا

مطلوب زعيم
ع المسؤولية يكون أمين
ويكون جرئ ويكون شجاع
مش إمعة وحتة بتاع
يعرف يقول للظلم لأ
ويموت ولا يفرط في حق

مطلوب زعيم
نقدر نحاسبه بالقانون
أو نعزله لو للأمانة يوم يخون
لا يشترط الشكل إيه
لا يشترط السن إيه
لا يشترط الملة إيه
شرطه الوحيد يكون بشر
بالإختصار، مطلوب دكر