Chanterai por mon coraige
Que je vuil reconforter,
Qu'avecques mon grant domaige
Ne quier morir n'afoler,
Quant de la terre sauvage
Ne voi mais nul retorner
Ou cil est qui rassoaige
Mes maus quant j'en oi parler.
Dex, quant crieront 'Outree,
Sire aidiez au pelerin
Par cui sui espoantee,
Car felon sunt Sarrazin.


De ce sui au cuer dolante
Que cil n'est en biau voisin,
En cui ia mise m'entente
Or n'en ai ne jeu ne ris.
Se il est beax et je sui gente,
Sire, por quoi le feïs?
Quant l'un a l'autre atalante
Por que vos en departir?
Dex, quant crieront...


Soffrerai en tel estaige
Tant g'ou voie repasser.
Il est en pelerinaige;
Mout aten son retorner,
Car augré de mon lignaige
Ne quier achoison trover
D'autrui face mariaige:
Mout est fox qui vuet parler.
Dex, quant crieront...


De ce sui ie deceue
Quant ne fui au comvoier
Sa chemise qu'ot vestüe
M'envoia por embracier.
La nuit quant s'amors m'argüe
La met avec moi couchier
Mout estroit a ma charnüe
Por mes maus asoagier.
Dex, quant crieront...


De ce sui en bone entente
Quant je son homaige pris,
Quant l'aleinne douce vante
Qui vient dou tres douz pais.
Ou cil est qui m'atalante
Volentiers i tor mon vis
Lors m'estuet que je la sente
Par desoz mon mantel gris.
Dex, quant crieront...