A chantar mer de so q'ieu no volria
Tant me rancur de lui cui sui amia
Car eu l'am mais que nuilla ren que sia;
Vas lui nom val merces ni cortesia,
Ni ma beltatz, ni mos pretz, ni mos sens,
Qu'atressi-m sui enganada e traia
Cum degr' esser, s'eu fos desaviens.


D'aisso-m conort car anc non fi faillenssa,
Amics, vas vos per nuilla captenenssa,
Anz vos am mais non fetz Seguis Valenssa,
E platz mi mout qez eu d amar vos venssa,
Lo mieus amaics, car etz lo plus valens;
Mi faitz orguoill en digz et en parvenssa,
E si etz francs vas totas autras gens.


Metavill me cum vostre cors s'orguoilla,
Amics, vas me, per q'ai razon quum duoilla;
Non es ges dreitz c'autr'amors vos mi tuoilla
Per nuilla ren qe us diga ni us acuoilla;
E membre vos cals foI comensamens
De nostr'amor. Ja Dompnidieus non vuoilla
Q'en ma colpa sia l departimens!


Proesa grans q'el vostre cors s'aizina
E lo rics pretz q'avetz m'en atayna,
C'una non sai loindana ni vezina,
Si vol amar, vas vos non si aclina;
Mas vos, amics, etz ben tant conoisens
Que ben devetz conoisser la plus fina,
E membre vos de nostre covinens.


Valer mi deu mos pretz e mos paratges
E ma beutatz e plus mos fis coratges,
Per g'leu vos mand lai on es vostr'estatges
Esta chansson que me sia messages:
E voill saber, lo mieus bels amics gens,
Per que vos m'etz tant salvatges,
Non sai si s'es orguoills o mals talens.


Mas aitan plus vuoill li digas, messagtes,
Q'en trop d'orguoill ant gran dan maintas gens.