وقت غروب الشمس واقف ع البحر بعيد
عمال بحكي له وأشكي له وأشرح وأعيد
فجأة لاقيتها وكنت فاكرها عروسة البحر
خارجة من الماية وطلتها أقوى من السحر

لما شفتها قلبي دق ثلاث دقات
والطبلة دخلت لعبت جوه دماغي حاجات
لما الرق دخل قلبي رق وحنيت
طب هعمل إيه رحت أنا غنيت

إمتى الحب طال قلبي ولا في الخيال
عودك ده فيه يتقال موال
ويا عيني ياه يا سيدي على الأيام
لما تهادي قلوبنا غرام فجأة يهون كل اللي فات

ولاقيت جوايا خناقة كبيرة قامت على طول
عقلي يعقلني وقلبي يقول لي روح لها قول
مخدتش ثواني وكان قلبي طالع كسبان
روحت وقلت لها، إن أنا ولهان
إمتى الحب طال قلبي ولا في الخيال
حبك ده فيه يتقال موال
ويا عيني ياه يا سيدي على الأيام
لما تهادي قلوبنا غرام فجأة يهون كل اللي فات

وتمر شهور وسنين على يومها ومش ناسيين
أنا شفتك إمتى يا حب العمر وشفتك فين
وبنيجي سوى نحكي حكايتنا هنا للبحر
عن قصة حب، أقوى من السحر
إمتى الحب طال قلبي ولا في الخيال
عشقك ده فيه يتقال موال

ويا عيني ياه يا سيدي على الأيام
لما تهادي قلوبنا غرام فجأة يهون كل اللي فات
ويا عيني ياه يا سيدي على الأيام
لما تهادي قلوبنا غرام فجأة يهون كل اللي فات